SC-in PM Modi leh RSS lem ziaktu sawisel

Supreme Court chuan Indore-a cartoonist, Hemant Malviya chu prime minister Narendra Modi leh Rashtriya Swayamsevak Sangh (RSS) cartoon a ziah danah sawiselin, a thil tih dan chu a puitlin loh thlak hle a ni, a ti.

Justice Sudhanshu Dhulia leh Aravind Kumar awmna bench chuan cartoonist-in bail a dilna chungchang nimin khan a ngaihtuah a, hemi rual hian a thiltih dan chu inhuatna chawk chhuak thei leh puitlin loh thlak tiin a sawi sak a ni. Hemant Malviya aiawhtu, advocate Vrinda Grover chuan a cartoon pawh hi paih a ni tawh tih sawiin, mi dang pawisawi tumna a ni lo tih a sawi.

Malviya hi Facebook-a PM Modi leh RSS cartoon a siam a post avangin RSS activist Vinay Joshi-a'n a khing a, kumin May thla khan Bharatiya Nyaya Sanhita hnuaia section 196,299 leh 352 hmangin thubuai siamsak a ni. Information Technology Act hnuaiah pawh thubuai siamsak a ni tel bawk. Cartoon a siam hi RSS uniform ha pakhat, a kerkawr bul pawtthlaa Prime Minister hmaa a mawng a ti lang lai a ni. Modi lem hian stethoscope a awrh a, a kutah inchiuna tur a keng bawk.