Dan phal loha damdawi siamtu UAE aṭangin India-ah hlan a ni

Central Bureau of Investigation (CBI) hmalaknain dan phal loha damdawi siamtu, Kubbawala Mustafa chu nimin khan UAE aṭangin India-ah rawn thawn kir a ni. Mumbai police-te ngenna angin Mustafa lakah hian Interpol Red Notice pawh tih chhuah a lo ni tawh bawk.

Official-te chuan Mustafa hruai haw tur hiam state police team, member pali awmna chuan UAE hi an pan tih an sawi. Mumbaia-a Chhatrapati Shivaji Maharaj International Airport rawn thlenpui a nih hnuah Mumbai police-a crime branch kutah dah nghal a ni.

Mumbai police-te chuan kum 2024 khan Sangli-a ruihhlo siam chhuah hmun an dapnaah mephedrone drug kg 126.141 chu hmuchhuakin an man zui nghal a ni. He factory hi ram pawn lam aṭangin Mutafa hian a rawn enkawl tih official-te chuan an sawi. Mustafa hian heng dan phal loh damdawi siam chhuahna tur hmanrua leh dawidim hrang hrangte chu high quality mephedrone siam chhuahna atan hian a supply ṭhin a, raw material hi Ahmedabad aṭangin a la ṭhin niin an tarlang bawk. An siamchhuah hnuah Gujarat-ah a sem darh ṭhin a ni.