Ram 5 tlawha zin PM Modi a rawn haw

Prime minister Narendra Modi chu July 2 aṭanga ram panga tlawha a zin kual hnuah nimin, July 10 zing khan New Delhi-ah a rawn kir . July 2-9 chhung khan Ghana, Trinidad and Tobago, Argentina, Brazil leh Namibia te a tlawh a, Brazil-ah 17th BRICS Summit a hmang nghal bawk.

PM Modi hian Ghana, Trinadad and Tobago leh Namibia parliament-ah thu a sawi a, heng ram pahnih nen hian ram dang parliament 17-ah thu a sawi tawh a ni. Brazil leh Namibia sorkarin an ram civil chawimawina sang an lo hlan bawk a ni.

Ram panga a tlawhnaah hian Modi hian India nena an thawh dunna tih chak dan tur hrang hrangte a sawipui a, thawh hona tur inremnate puangin memorandum of understanding (MoU) te pawh ziah a ni bawk.

PM chuan Manipur a tlawh hman tawh ang - Congress

Congress party chuan ram panga tlawha zin, PM Modi lo haw chu lo ti el nghalin, tunah chuan Manipur tlawhna hun pawh a nei thei tawh ang, an ti. Hei bakah Pahalgam-a pawikhawihna rapthlak tak thlentu, firfiakte chungthu pawh a ngaihtuah hman tawh ang chu tiin an lo sawi.

Congress general secretary, in-charge communication Jairam Ramesh chuan, "India chuan a Super Premium Frequent Flier PM lo haw chu a lo lawm e" tiin, a zin a rawn haw leh tak avangin kum hnih chuang a hmel hmuh duha lo nghak tawh, Manipur tlawhna hun pawh a nei thei tawh ang, a ti. Hei bakah tun thlenga Pahalgam firfiakte chungchanga rorelna kenkawh a la nih loh chungchangte ennawnin, a chawr chhuahna state-a infrastructure chhiatna thleng leh tuilian vanga harsatna tawk mek Himachal Pradesh puihna turte pawh a ngaihtuah hman tawh ang, tiin Ramesh chuan a sawi.