INDIA-in Bihar electoral roll revision duh lohna lantir

Eptu party intelkhawm, Indian National Developmental Inclusive Alliance (INDIA) chuan kumina assembly inthlan neihna tur, Bihar-a electoral roll revision neih duh lohna lantirin state pumah nawrh an huaihawt. Patna khawpuia nawrh huaihawt chu Congress party hruaitu Rahul Gandhi leh Rashtriya Janata Dal (RJD) hotu Tejashwi Yadav ten an ho a ni.

State chhung hmun hrang hranga nawrh huaihawtnaah hian prime minister Narendra Modi, Bharatiya Janata Party (BJP) leh Election Commission of India (ECI) laka lungawi lohna thuziakte kengin an aurual bawk.

Bihar assembly inthlan hi kumin October-November vela neih tur a ni a, hetih lai hian June 24 khan ECI chuan khawpuia cheng an pun chak vang leh, pem lut awm ve reng vang te, first-time voter an pung hnem leh mitthi zat report a mumal lo nia sawiin electoral roll ennawna, Special Investigation Revision (SIR) neih a nih tur thu hi puangin kalpui mek a ni. Eptute chuan ECI thiltih dan hi na taka sawiselin, inthlan hnaivai tawh taka kalpui a ni hi a ngaihṭhat thlak lohin ngaihtuah zui ngai tak a ni, an ti.

Supreme Court-ah pawh revision kalpui chungchangah hian petition eng emaw zat theh luh a ni. Petition thehluttute chuan ECI hian revision a kalpui dan leh a kalpui hun hi ngaihtuah ṭhat a ngai tih an sawi. ECI hian voter-te chu India khua leh tui dik tak an ni ngei tih finfiahna tur document 11 phutin, hengte hi ni 30 chhunga pe vek turin a ti. Document an phutah hian a hmaa an lo pawm sa tawh - Aadhaar, ECI photo identity card leh ration card te a tel lo.

RJD hruaitu Tejashwi Yadav chuan ECI chu political party pakhat tana thawkah puhin, a rintlakna a hloh tawh a ni, a ti. Rahul Gandhi pawhin SIR chu Bihar mipuite vote lak bo sakna tur chauh ni loin, an hmalam hun chhuhsak an tumna a ni tiin, hei hi Bihar ṭhalaiten an duh dawn lo a, eptu pawl pawhin an dinpui zel dawn tih a sawi.