PM Modi hnenah Brazil civil mi chawimawina sang ber hlan

Prime minister Narendra Modi hnenah Thawhlehni khan Brazil-in civil mi chawimawina sang ber a hlan ṭhin, Grand Collar of the National Order of the Southern Cross chu hlan a ni.

Brazil president Luiz Inacio Lula da Silva chuan PM Modi hnenah chawimawina hi hlanin, hei hi Brazil leh India inlaichinna ti chak a, khawvel huap platform hrang hranga India leh Brazil thawhdunna ṭha leh zau zawk a siam avanga hlan an nih thu a sawi.

PM Modi pawhin he chawimawina hlan a nih avang hian Brazil President, Brazil sorkar leh an ram mipuite chungah a lawm takzet tih a sawi. A chawimawina dawn chu a tan ni loin, India ram mipui vaibelchhe 140-te tana chawimawina leh inchhuanna a ni, a ti.

Kum 2014 May thlaa India prime minister atana lak luh a nih hnuah, Modi hian ram dang aṭanga chawimawina a dawn 26-na a ni. India Prime Minister zinga chawimawina dawng hnem ber a ni tawh a ni. Kumin bikah pathum a dawnna a ni bawk.

Ram panga tlawh tura zin chhuak, PM Modi hian nimin khan a ram tlawh hnuhnunna ber turin Brazil aṭangin Namibia a thleng. Kum 30 hnua India PM zinga Namibia ram tlawh hmasa ber a ni. A cham chhung hian technology, health, infrastructure, development, leh security lama ram pahnihte thawhdunna siam dan turte an ram hruaitute a sawipui ang.