Iran aṭangin India zirlai 100 phur haw

Iran leh Israel inkar buainain zual lam a pan zel avangin Iran-a Urmia University zirlai 110 chu Thawhlehni khan thlawhtheihnain India ramah rawn phurh haw an ni.

Zirlai hruia hawte hian Armenia-a Yerevan aṭangin Delhi an rawn pan a, Indira Gandhi Airport, New Delhi-ah darkar 52 hnu, Ningani khan him takin an rawn thleng. Zirlai 110 zinga 94 te hi Jammu and Kashmir-a mi niin, a dang zawng hi state hrang hrang Delhi, Maharashtra, Uttar Pradesh leh Rajasthan mi an ni thung. Heng zirlai lo thleng ṭhenkhatte hi an chhungten aiport-ah lo hmuakin J&K pan turte erawh escort-na hnuaiah an chenna panpui an ni bawk.

Minister of state for external affairs Kirti Vardhan Singh chuan ram pahnih inkar buaina vang hian mi dang tam zawk pawh hruai chhuak tura hma an lak mek thu leh nimin Ningani khan heng India mi cheng la awmte hruai tur hian thlawhtheihna dang tirh belh a nih tawh thu a sawi. Heng hmalakna hlawhtlin theihna tura Turkmenistan leh Armenia sorkar thlawpna vangin lawmthu a sawi bawk a ni.

Nimina zirlai lo thlengte hi Iran-Israel buaina chhuah hnua hruai haw hmasak ber an ni a, sorkar leh thuneitute hmalakna avanga an lawmthu pawh an sawi. Hetih laiin J&K a zirlai ṭhenkhat chuan airport an chhuahsan duh lo a, ni li chhung zinkawng thui tak an rawn zawh hnua state bus hmanga in hruai haw chu pawmthiam harsa an tih thu an sawi.