India leh US in 'Tiger Claw' hlawhtling takin nei

India leh US chuan ram pahnih Air Force-te thawh dunna thuam chakna tura a vawi khatna atana boruaka nunchan zirna, 'Tiger Claw' exercise chu hlawhtling takin an zo.

'Tiger Claw' exercise hi Indian Air Force (IAF) leh United States Air Force (USAF) chuan May 26 aṭang khan India hmar lam van boruakah neiin, Nilaini khan Garud Regimental Training Centre (GRTC)-ah an zo ta a ni.

Kar hnih awh nunchan zirnaah hian, ram pahnih air force-te chuan kawng hrang hranga thil thiam in zirtir tawnna an neih bakah, a huhoa training-te buatsaih niin thawh ho dan ṭha neih theih dan turte zir ho a nih thu IAF chuan a tarlang. Nunchan zirna hi India hmarlam huam chhung hmun hrang hrangah neih niin, 'Tiger Claw' tih hman a nih chhan pawh sakei chu chak leh thiltithei tak nia hnam hrang hrangin an ngaih a nia, a tin hriam tak 'claw' chu thiltitheihna leh thuneihna entirtu a nih thu an tarlang.

Ram pahnih sipaiten nunchan zirna hmun atana an hman hi elite Special Forces unit, Garud Commandos an tih te inkhuarna hmun niin Air Force Station, Chandinagar, Uttar Pradesh-a awm a ni.

India-France-in 'Exercise Shakti 2025' June 18-ah

India leh US in sipai nunchan zirna an neih zawh hnuah India chuan France nen 'Exercise Shakti 2025' chu France-a La Cavalerie-ah June 18 aṭanga July 1 thleng an nei leh dawn. Ram pahnih sipaite nunchan zir tur hi a ṭum riatna tur niin, kawng hrang hranga thawh hona ṭha neih theihna tura tih a ni.

India leh France hi kum 100 chuang ṭhianṭha lo ni tawh in, France hi India nena ram nuclear hmanga in sumdawn tawnna tura inremna nei hmasa ber a ni. He inremna hi International Atomic Energy Agency leh Nuclear Suppliers Group te pawmpuina thlapa neih a ni bawk.