US bultumin dan loa pem lut laka hma lak dan sawi ho

US Mission bultumin India leh Vietnam chuan Nilaini khan dan loa ramchhunga pem lut awm ṭhinin a nghawng theih hrang hrang in zirtirna leh policy duan dan chungchang visual hmangin sawi hona an nei. Thupui atan “Smart Choices, Safe Futures: Understanding the Risks and Realities of Illegal Migration” chu hman a ni a, US-a Director of Federal Relations for Numbers, Michael Hough kaihruainaa neih a ni.

Inzirtirna leh hmalak dan hrang hrang awm thei inhrilh hriatna hun hmanah hian, India leh Vietnam aiawhte chuan dan loa ramchhunga pem lut dawnsawn dan leh US-in immigration policy a duan chhuah dante an zir ho. Hough hian president Donald Trump a hmalaknate uar taka sawiin, ramri venhimna leh dan lo a pem lut dan chah a nih theihna tur a in lungrual a ṭul thute a sawi.

Dan loa pem lut awm ṭhinin dan leh hrai a nghawng theih dante sawi bawkin, heng a thlen lohna tura US in 'economic and public policy' ṭha tak, ramchhunga pem lutte tana duan an neih chungchangte zir hoin, dan loa pem lut awm ṭhinin vantlang nun a nghawng theih dan ṭha lo te an sawi ho bawk.

Hough chuan visa-in a huam chin bak thleng zinna hmuna cheng lui an tam thu sawiin, chawhrualin hetiang vanga thubuai nei 7,000 bawr kum tin awm ṭhin angin a tarlang. Hei bakah hun rei tak aṭanga buaipui hlawh tawh, dan loa pem lut awm chungchangah president dang te aia Trump-an hma a lak nasat zawk thute pawh a tarlang tel bawk a ni.

Trump-a sorkar hnuaia ramri kana dan lo a pem lut awm ṭhin chinfel a nih theihna turin USD tld 150 chu funding atana ruahman a nih thu te sawiin, hei hi ram chhunga pem lut enfiahna tur leh chhui zuina tur hrang hrang - drone, biometric screening, leh hmanrua thuam ṭhatna atana hman tura tih a nih thu a sawi.