SC thupek zawmin NEET-PG exam sawn hla

National Board of Examination in Medical Sciences (NBEMS) chuan Supreme Court in NEET-PG exam thawh khata nei tura a tih bawhzuiin Thawhṭanni khan NEET-PG 2025 Examination huaihawt tur chu sawn hlat a nih thu an puang. NEET-PG exam hi June 15-a neih tura lo ruahman tawh a ni a, sawn hlat a nih hun tak hi tih fel a la ni lo.

National Eligibility-cum-Entrance Test Postgraduate (NEET-PG) exam sawn hlat a nih thu puan hi, May 30-a Supreme Court-in exam thawh hniha neih ṭhin thawh khata nei tura thupek a tih chhuah tih hlawhtlinna tur a ni. Court sangber thuchhuah siamah hian exam thawh hniha neih chuan langtlang tak leh exam buatsaihna hmun tih fel kawnga eng mah danglamna a thlen chuang lo niin a tarlang.

Exam hun sawn hlat a nih avangin, exam pek tum candidate-te chuan NBEMS chu exam hun tura ruahmanna thar an siam chu a rang thei ang bera ti chhuak turin an lo nawr ve nghal. NBEMS lam pawhin SC thupek zawma hma an laknaah zirlaite tan a exam sawn hun tur chu rang taka tarlan tum a nih thu an puangzar ve nghal bawk.