PM thaha vautu Bihar mi man

Bihar-a ni hnih cham tura zin, prime minister Narendra Modi thahah vautu Bihar mi chu police-ten an man.

PM thahah vautu hi Bhagalpur district-a cheng, kum 35 mi Sameer Ranjan a ni. Ningani khan Maheshi thingtlang khuaah man a ni a, Sultanganj Police Station-ah kawl mek a nih thu police chuan an tarlang.

Bihar police chuan in vauna thu hi Whatsapp call hmanga dawn a ni tih an sawi. PM hi Bihar-a a cham chhunga thah tum a nih thu an dawng a ni. PM thah tum a nih thu hi Bhagalpur Senior Superintendent of Police (SSP) hrilh hriat niin thil thleng chhui chiang turin special team din nghal a ni bawk.

Chhuichianna hmasa neihna aṭangin phone call tihna atana hman phone number hi kum 71 mi, Mantu Chaudhary tih hriat chhuah a ni. He mi hnua chhui zauna an neih aṭangin Sameer Ranjan hian virtual private network (VPN) hmangin Choudhary number hi Whatsapp call-na atan a hman sak niin Bhagalpur police thuchhuah chuan a tarlang.

PM hian Ningani khan Bihar thlengin state chhunga hmasawnna hna thawhna tur project hrang hrang, Rs vbc 48,520 hu a hawng a, nimin khan Karakat-ah rally a nei bawk.