Congress-in Bihar hmeichhiate thla tin Rs 2,500 pek tiam

Congress party chuan assembly inthlan lo awm turah INDIA bloc in hnehna a chang a nih chuan, Mai Behan Mana Yojana hnuaiah Bihar-a hmeichhiate hnenah thla tin Rs 2,500 pek an tiam. An pawisa pek tur hi thla tinin an account-ah an dawng thei dawn a ni.

Party hmeichhe pawl president Alka Lamba leh state chief Rajesh Kumar chuan he scheme hian tualchhunga hmeichhe hrang hrangte chu sum hmanga chhawmdawlna a pe thei dawn niin an tarlang ve bawk. Rakesh chuan Behan Mana Yojana aṭanga sum pek tur hi Coordination Committee INDIA bloc chuan a pawmpui tawh tih a sawi lang bawk.

Congress-in hmeichhiate hnenah puihna sum pek an tiam hma hian, INDIA bloc hnuaia Congress thawhpui, RJD hruaitu Tejashwi Prasad Yadav chuan nikum December thla khan 'Mai Behan Maan Yojana' kalpui a, hmeichhe tin hnena pawisa pek chu a lo tiam tawh bawk. Assembly inthlan lo awm turah Bihar hmeichhiate hi vote bank lian tak tur an ni tih an hriat vangin party tin hian hmeichhia lam tih lungawina tur hian ṭan an la nasa hle a ni.