India leh Pakistan-in sipai hren an inthleng

India leh Pakistan chuan nimin Nilaini khan Punjab ramri, Attari–Wagah hmunah sipai an hrente an inthleng.

Pakistan Ranger-ten April 23-a Border Security Force (BSF) constable Purnam Kumar Shaw, Punjab-a ramri kan an man leh India-in Pakistan Ranger, May 3-a an man an hren zui tak, Muhammad Allah chu a inthleng tih sorkar official chuan an tarlang. Ram pahnihte hian May 10 khan sipai inbeihna ti tawp a, inkahhai puan an lo remti tawh a ni.

Sipai man inthleng chungchang hi BSF lam chuan Pakistan Ranger te nen meeting an neih ṭhin leh inbiak pawhna hrang hrang kaltlanga an inbiak hnuah tih fel theih a nih thu an sawi.

BSF constable Shaw hi Ferozepur sector huam chhunga operational duty a nei lai chu Pakistan Ranger lam hian an lo hreng zui nia sawi a ni. 182nd Battalion constable man hi Pahalgam-a firfiak pawl beihna thlen hnu lawkah niin, Shaw hian loneitute chu Ferozpur sector-a ramri hungna piah thleng a kalpui a, hemi hnua uniform leh service rifle nen a hahchawl lai chu Pakistan Ranger lam hian an man a ni.

Pakistan sipai lam chuan India nena an in beih laiin an mi leh sa 11 an thih bakah midang 78 in hliam an tuar tih a sawi. Pakistan sipai thite hi Air Force mi leh sa panga leh Pakistan Army paruk niin, an zingah hian Squadron Leader pawh a tel niin an sawi.