Telangana-ah district thar 21 siam

Telangana state-ah nimin khan district thar 21 siam a ni a, hengte nen hian ramchhunga state naupang ber hian district 31 a nei dawn ta a ni.

Kum 2014, June 2-a India ram state 29-na tura din a nih khan district 10 ah ṭhen a ni. District 21 siam tharah hian Hyderabad tih loh, district awmsa 9-te hi sawi danglam an ni bawk.

Rorellai Telangana Rashtra Samithi (TRS) chuan district siam ṭhat a ni ta chu lawmawm an tih thu sawiin, hei hian state sorkar rorelna kawngah a pui thei dawn a ni, an ti. Mahse eptu pawl - Congress, TDP leh BJP chuan TRS sorkar district a ṭhen sawm dan chu awmze nei lo lutuk nia an ngaih thu an sawi thung.

Council-a eptu hruaitu, Mohammed Ali Shabbir chuan sorkar chuan district siamrem chungchangah all-party meeting vawi khat chiah a ko niin a sawi.

Nimin khan district siam tharte hi minister hrang hrangten an hawng a ni. Hyderabad tih loh, district tinah hian chhungkaw nuai hnih aṭanga nuai li vel an awm dawn a, Hyderabad chu district dang aiin a lian fal bik dawn a ni.

Assembly inthlan dawn khan TRS hian an manifesto-ah district thar 14 din a tiam a, mahse bial hrang hrangte district pek phuta sorkar an nawr avangin an tipung ta a ni. District thar siam rual hian revenue division 25, mandal 125, police commissionerate pali, police subdivision 23, circle 28 leh police station 91 siam thar a ni bawk.