Delhi CM-in inhlawhfate Delhi chhuahsan lo turin ngen
Delhi chief minister Arvind Kejriwal chuan sorkar laipuiin lockdown a puan avanga inhlawhfa, hna thawk chhunzawm thei loa awmte chu Delhi chhuahsan lo turin a ngen. In neitute pawh an in luahtute in luah man dil lui lo turin a ti bawk.
Lockdown puan a ni hnuah, Delhi-a inhlawhfaa awm mi tam tak chuan an khaw lam an pan a, motor tlante a awm loh avangin ke in thui tak tak an kal a ngai a ni.
Kerjiwal chuan, "Lockdown puan a nih khan, PM chuan mitinte chu an awmna chhuahsan lo turin a ngen nghal a ni. Hetih lai hian khawpui hrang hranga hnathawka awmte chu an khaw lamah kir tumin an buai hle tihte kan hria a ni. Heng mite hi an nunna leh an chhungte nunna derthawnga dah lo tur leh, pungkhawm lo turin ka ngen a ni. Hri leng khuahkhirh tumin ram pumin kan bei mek a ni," a ti.
Delhi sorkar hian hmun dang aṭanga hnathawka awmte chu a ngaihtuah zel dawn tih sawiin, an awmna turin school-te pawh buatsaih a ni tih a sawi. Heng hmunah hian a thlawnin ei tur pawh sem a ni bawk.
In neitute hnenah an inluahtute chu in luah man dil lui rih lo turin Delhi CM chuan a ngen bawk. "Thla hnih khat hnuah sum indaih loh vanga inluah man an pe thei lo che u a nih pawhin, keiman ka rawn ngaihtuah pui ang. Tunah chuan lungrual taka kan thawhho a ngai a ni," a ti.