Covid-19 veite enkawltu Doctor-te awmna turin 5-star hotel buatsaih
Delhi sorkar chuan Lok Nayak Hospital leh GB Pant Hospital-a Covid-19 veite enkawltu, doctor-te chu 5-star hotel-ah an awmna tur a buatsaih sak dawn a, a senso pawh sorkarin a tum vek dawn a ni.
Pathianni khan Delhi health department chuan thuchhuah siamin, central Delh-a Lalit Hotel-ah doctor-te awmna tur hi pek an ni dawn tih a sawi. He hotel-a room 100 chu doctor-te awmna lailawk atan hian ruahman a ni a, New Delhi district magistrate chuan thil ṭulte buaipuiin tihfel thuai a ni dawn.
Uttar Pradesh sorkar pawhin Lucknow-a hotel pali - Hyatt Regency, Fairfield Hotel, Piccadilly Hotel leh Lemon Tree Hotel-te chu Covid-19 vei enkawltu doctor leh paramedical staff-te inkhung hranna tur atan a ruahman sak bawk.
Hri kaite enkawla theihtawp chhuahtu, doctor, nurse leh medical staff dangte thawhrimna leh inpeknate'n hmun hrang hrangah fak an hlawh a, Janata Curfew ni pawhin tlai lamah an chungah lawmthu sawinan kut ben hunte siam a ni. Hetih lai hian ramchhung hmun ṭhenkhatah chuan damlo enkawltu doctor-te chu an inluahnate'n hnawtchhuakin, an awmna vengte'n thinhrik leh ṭawngkam mawi lo taka an tihnawmnahte an awm. He thil thleng hi PM Modi ngei pawhin pawi a tih thu sawiin, hetiang report awm hian a rilru a ti na hle tih a sawi hial. Coronavirus kai enkawltu doctor leh medical staff-te chu pathian, tisaa rawn changte an ni ti hialin a fak a ni.