Sorkar laipuiin lockdown pawhsei a tum lo
Covid-19 darh zel tur venna atan sorkar laipuiin ram puma lockdown a puan mek pawhsei a tum nia thuthang awm chu a dik lo tih sawiin, sorkar chuan lockdown pawtsei tura ruahmanna siam a awm lo tih a sawi.
Prime minister Narendra Modi chuan March 24 zanlai aṭanga hman ṭan turin ram pumah ni 21 chhung inkharkhipna, complete lockdown a lo puang tawh a ni. Hetih lai hian ni 21 hnuah pawh lockdown hi pawhsei a ni dawn niin thuthang a awm a, cabinet secretary Rajiv Gauba chuan nimin khan hemi chungchang hi sawifiahin, pawhsei tumna awm lo tih a sawi a ni.
Pathiannia thla tina radio programme a neih ṭhin, Maan Ki Baat a hmannaah PM Modi chuan lockdown puanin mi rethei leh harsa zawkte tana harsatna a thlen dante a hriatthiam thu a sawi a, mahse hri darh tur venna kawng ṭha ber chu inkharkhip rih chu a ni tiin, lockdown puan lo chu thlan tur dang a awm rih lo tih a sawi. Lockdown puan a ngaih avangin thupha pawh a chawi a, hemi rual hian mipuite chu sorkar thupekte zawm turin a sawm nghal bawk.