KIIT campus-ah Nepal mi zirlai thia chhar leh a ni

Odisha-a Bhubaneswar khawpuia Kalinga Institute of Industrial Technology (KIIT) University-ah Ningani khan Nepali zirlai hmeichhia pakhat chu campus-a an hostel-ah thia hmuh a ni.

Nepal Ministry of Foreign Affairs chuan zirlai thih dan chungchang hi uluk taka chhui chiang turin sorkar a phut a, thudik hailang tura hma la turin a ngen. India rama Nepal ambassador Shankar P Sharma chuan Nepali zirlai thihna thleng chungchangah Ministry of External Affairs, Odisha sorkar, police leh university thuneitute chu hma la tura ngenin an biak pawp reng thu a tarlang.

University campus-a Nepal hmeichhe thi hi Prisa Sah, kum 18 mi niin B. Tech, Computer Science First year zirlai a ni a, a room-ah mahni intihlum anga hmuh a nih thu police lam chuan an tarlang. Lehkha hnutchhiah a nei lo a, a ruang hi nimin Zirtawpni khan a chhungte hnen a thleng a ni.

KIIT University-ah hian kumin February khan Nepali hmeichhe zirlai tho chu a room-ah thi a hmuh a lo ni tawh bawk. He thihna thleng vang hian campus chhungah dikna humhim duh vangin lungawi lohna lantirin complaint te theh luh a ni. Mahse, complaint theh luh te hi hnawl sak a nih bakah, buaina sosang chhoin Nepali zirlai 500 chuang chu University aṭanga chhuah tir an lo ni tawh bawk.