PM Modi-an Kerala lawng chawlh hmun a hawng

Prime minister Narendra Modi chuan nimin Zirtawpni khan Kerala-ah Vizhinjam International Seaport, lawng chawlh hmun Rs vbc 8,877 senga sak chu a hawng. He lawng chawlh hmun Adani Ports leh Special Economic Zone Ltd (APSEZ) leh sorkar thawk dunin an siam a ni.

Vizhinjam Port hi Kerala khawpui, Thiruvananthapuram-a awm a ni a,ram chhunga bungraw lian phur lawng chawlh hmun bik atan duan hmasa ber niin, sorkar laipui hmathlir, kum 2047-a India ram develope country-a siam hman tumna, 'Viksit Bharat' a thlen theihna atana kawng pawimawh tak a ni. Vizhinjam Port hian ram hmasawnna turin hmun pawimawh tak a chang dawn a, he lawng chawlh hmun lian hi khawvel insumdawn tawnna huangah India tana hmasawna thlentu tur a nih ngei a rinawm. He port siam a nih hma hian bungraw phur lawng lian zualte chu India lawng chawlh hmunah an dawl loh avangin Singpore, Colombo leh Dubai-ahte an chawl a, heng aṭang hian lawng te zawk hmangin phur chhawn leh an ni ṭhin.

Nikum July thla khan Vizhinjam Port enchhina hlawhtling taka neih a loni tawh a, hemi hnu hian lawng chawlh hmunah hian lawng lian 285 an chawl tawh a, an zingah hian khawvel huap pawha lawng lian ber zinga mite an tel. Nimina official-a PM-in a hawnnaah hian Kerala governor Rajendra Arlekar, chief minister Pinarayi Vijayan, Adani Group chairman Gautam Adani leh Congress MP Shashi Tharoor te an tel a ni.