US Secretary of State-in EAM leh Pakistan PM bia

US secretary of state Marco Rubio chuan external Affairs Minister S Jaishankar leh Pakistan prime minister Shehbaz Shariff te chu Nilaini khan a hran ve vea bia in, Pahalgam-a firfiakte chetna thleng vanga ram pahnih inkar buaina ti sosang lo zawnga in dawr turin a ngen.

Rubio hian US chu firfiak pawl chetna tu dai tura India thawhpui turin a in peih reng thu a sawi rualin, Pakistan lam pawh firfiak pawl beihna rapthlak tak chungchang chhuichian kawngah thawh pui theih turin a ngen nghal bawk. Hei bakah hian India chu Pakistan nena an inkar chu ti punlun lo turin leh South Asia ramte tana ralmuanna thlen tu ni zawk turin a hrilh bawk niin State Department thupuangtu Tammy Bruce chuan a sawi.

Hetih mek laiin Pakistan PM chuan an ramin firfiak pawl chetna nuaibo tura khawvel pum tana an thawh ve te tarlangin, firfiak pawl beihnaah hian an mi leh sa mi 90,000 chuangin an nunna an hlan tawh tih a sawi. Hei mai bakah an ram economy pawhin USD tld 152 chuang a chan phah thu a lo hrilh hre ve bawk. PM Shariff hian Pahalgam beihna thleng vang hian India chuan an ramin firfiak pawl nuaibo kawnga an thawhve nate tih buangbar a tum a ni tiin, India in a puhnate chu a dik tawk lo tiin a pha zui nghal.

Firfiakte pawikhawihna avang hian ram pahnih inkar hi a chhe chho chak hle a, hun rei tak aṭanga inremna an lo neih tawh 1960 Indus Water Treaty tih tawp a ni a, Attari aṭanga in kalpawhna kawng dan a nih bakah India chuan Pakistan airline-te chu India airspace an hman a khap sak zui bawk. Hemi chungchanga hriattirna, NOTAM (Notice to Airmen) chu Pakistan airlines hnenah a ti chhuak tawh a ni.

Pakistan chuan Indus Water Treaty tih tawp chuan Pakistan mi maktaduai 240 chuang ei bel a ngawng dawn tih sawiin he buaina vanga tih tawp ngawt theih a nih loh thu a sawi lang bawk.

Pahalgam beihna thleng hi kum 2019-a Pulwama beihna chhuah hnua firfiak pawl chetna thleng leh rapthlak ber niin, hei hian ram ṭhenawm karah inghirnghona a ti zual nasa hle a ni.