'Pak Cyber Force' in Rajasthan Education Dept website an hack

Rajasthan Education Department official portal chuan nimin Thawhlehni khan cyber attack tawkin khawih danglam a ni. Portal hack-ah hian an website home page-ah ṭawngkam dengkhawng tak chhiar tur a rawn ti lang a, "Pakistan Cyber Force' tih a chuang kulh bawk a ni.

Website hack sak an nih hnu hian Pahalgam firfiak pawl beihna thleng chu ruahman lawk a nih thu leh, India ram chhung aṭanga thil tih vek a nih thu te a in tarlang. Heng bakah hian firfiak pawl kut tuara thi ta Lieutenant Vinay Narwal ruang bula a nupui ṭhu lai thlalak te chu chan chawp ni ang hialin an tarlang zui bawk.

He cyber beihna thleng chungchangah hian cyber expert chuan fimkhur a ṭulna tarlangin, sorkar digital bungruate hman khawloh a nih tak avang hian state department nen a in thlunzawm, ram chhung hmun hrang hranga page nuai 20 chuang chu tih buai a nih theih thu a sawi lang. Rajasthan-ah chauh pawh hian page nuai riat vel awm nia rin a ni a, heng zingah hian Home Department leh district level police unit te pawh a nghawng theih a rin thu expert hian a sawi.

Cyber attack hi a thlen chhoh fo a rinawm avangin expert chuan,rang takin digital huang venhimna ṭha zawk chu neih a ṭul thu a sawi a, sorkar website hrang hrangte venghima lo en dik reng thei tur security framework ṭha zawk neih a ṭul hle a ni, a ti.