President Murmu in Portugal a thleng

President Droupadi Murmu chuan Pathianni khan ni hnih chhung cham turin Portugal a thleng. President hian Slovak Republic a tlawh nghal bawk ang.

President hi sipai thlawhtheihna ṭhum hmun, Figo Maduro-ah India ambassador Puneet R Kundal leh Portugal ambassador Joao de Almedia ten an lo hmuak a ni.Kum 27 hnua India President-in Portugal a tlawhna hmasa ber a ni. Ram pahnihte thawhdunnain kum 50 a tlin kum a ni bawk.

President Murmu hian Portugal ram hruaitu President Marcelo Rebelo de Sousa, Prime Minister Luís Montenegro leh Assembly Speaker Dr Jose Pedro Aguiar-Branco a kawm dawn a ni. A cham chhung hian Lisbon Mayor Carlos Manuel Felix Moedas chuan Murmu pual hian hun a buatsaihsak dawn bawk. Hei bakah hian President Rebelo de Sousa huaihawt banquet-ah a telpui dawn a ni.

India leh Porutgal insumdawn tawnna hlut zawng hi USD tld 1.5 tlingin a ṭhang duang hle a, kum nga liamta chhung khan 20% laiin a pung hman niin Ministry of External Affairs secretary Tanmaya Lal chuan a sawi. An thawh dunna hi renewable energy, IT, pharmaceuticals, education, tourism, leh defence huangah zauh tum anih thu an tarlang bawk.

India-EU free trade agreement chungchang pawh an sawi ho dawn tih President Murmu chuan a sawi. Portugal-a India mi leh sa pem awmte nen in kawmna hun an hmang nghal bawk ang. Tun dinhmunah India mi 125,000 bawr vel Portugal-a awm anga chhut niin heng zinga 35,000 chu India khua leh tui nihna nei te an ni a, a dang 90,000 chu India-a piang te an ni hlawm. President Murmu hian 'Alameda Mahatma Ghandi' an tihah Gandhi zahna lan tirna pangapar a dah dawn bawk a ni.

Murmu hian Portugal a tlawh zawh hian Slovak Republic chu April 9-10 chhung cham turin a pan leh nghal ang. Slovakia-ah hian ram hruaitute Slovak President Peter Pellegrini, Prime Minister Robert Fico, leh Speaker of the National Council Richard Rasi te a kawm ang.