Uttar Pradesh sorkarin sakhaw hmun hnaiha sa zawrh khap

Uttar Pradesh-a BJP sorkar chuan nimin, Pathianni aṭanga hman ṭan turin ni kua awh tur Chaitra Navratri Festival in puahchahna kal zelah sakhaw biakna hmun hnaih, meter 500 huam chhunga sa zawrhna hmunah sa zawrh a khap. Hei bakah hian Ram Navami, April 6 bik atan sa talh leh zawrh hrim hrim chu khap a nih thu a sawi bawk.

Urban Development Department principal secretary Amrit Abhijat chuan, state chhunga district magistrate, police commissioner leh municipal commissioner te chu rang taka ran talhna hmunte leh sakhaw puipunna hmun hnaiha sa zawrh te khap tura hriattirna chhuah tura tih an ni bawk a ni.

Chief minister Yogi Adityanath kaihhruai sorkar chuan, kum 2014 leh 2017 khan heng dan loa sa talhna hmun leh zawrhna hmun, sakhaw biakna bulhnaia awm chu khap pumhlum a lo ni tawh a ni. Heng hmalaknate a hlawhtlin theihna tur hian district level committee chu distict magistrate kaihhruaina hnuaiah din a ni bawk. Committee-ah hian police, Pollution Control Board, Animal Husbandry Department, Transport Department, Labour Department, Health Department and Food Safety Administration aiawhte an tel.

Ni kua awh tur Hindu kut hi an pathiannu, Goddess Durga puala hman tur a ni. Heng hun chhunga kaihhruaina tih chhuahte zawm lo chu UP Municipal Corporation Act 1959 leh Food Safety Act 2006 and 2011 te tlawhchhanin an laka na taka hremna kenkawh theih a ni.