PM Modi-a'n Thailand leh Sri Lanka tlawh dawn

Prime minister Narendra Modi chu BIMSTEC (Bay of Bengal Initiative for Multi-Sectoral Technical and Economic Cooperation) summit April 3-4 chhung Bangkok-a hman turah a tel ve dawn niin Ministry of External Affairs chuan nimin Zirtawpni khan a puang. Bangkok a tlawh hnuah April 4-6 chhung hian Sri Lanka a tlawh bawk ang.

Thailand-a neih tur, BIMSTEC summit vawi rukna hi hripui len hnua summit neih leh hmasa ber tur a ni. February 2021-a Myanmar sipaiten civil sorkar thuneihna an hnehchhuh vanga tualchhung buaina chhuah hnua BIMSTEC hruaitute an in hmuhkhawm lehna hmasaber tur a ni bawk. PM hian Thailand ṭum thum a tlawhna tur a ni. BIMSTEC-ah hian India leh Thailand bakh Sri Lanka, Bangladesh, Myanmar, Nepal leh Bhutan an tel a ni.

Prime Minister-in ram pahnih a tlawh tur hi thawh dunna ṭha leh tih chakna tur bakah, India-in tun hnaia 'MAHASAGAR policy' a puan kaltlanga Indo-Pacific huam chhung tih chakna atana hmalakna peng pawimawh kalpuina tur a ni. Hei bakah India-in 'Neighbourhood First' leh 'Act East' policy a kallpui tih hlawhtlinna tura a hmalakna a ni bawk.

Modi hian summit kar lakah Prime Minister kawmin, ram pahnih thawh dunna ṭha siam dan turte a sawipui dawn a ni. Sri Lanka president thar Anura Kumara Disanayaka pawh a kawm dawn bawk a, ram pahnihte thawh dunna lo neih tawhte thlir letin hmalam hun atana tih chakna lamte an sawu dun dawn a ni. PM Modi hian Anuradhapur-a India puihna hmanga hmasawnna project thawh hrang hrangte a hmunah a en nghal dawn bawk a ni.

PM hian hun rei tak siam tawh, Kashmir Valley leh ram chhung hmun dang inkalpawhna tur rel kawng chu April 19 hian a hawng dawn bawk a ni. He rel kawng siam hi km 272 a thui niin Udhampur-Srinagar-Baramulla Rail link project hnuaia thawh a ni a, Jammu and Kashmir-a Katra railway station aṭangin Vande Bharat rel a vai liam ang.