Voter ID leh Aadhar thlunzawm chungchangah CEC in high level meeting ko

Eptu pawl lamin hun eng emaw chen aṭanga voter list tih danglam chungchangah harsatna neuh neuh an siam laiin, Chief election Commissioner (CEC) Gyanesh Kumar chuan Union Home Secretary, Legislative Secretary leh Unique Identification Authority of India (UIDAI) Chief Executive Officer(CEO) te nen voter ID leh Aadhaar thlunzawmna tur chungchang hi sawi ho a rawt a ni. March 18 Thawlehni khian ṭhutkhawmna neih tum a ni.

He hmalaknate hi West Bengal-a Trinamool Congress ten 2026 Assembly in thlan lo awm tur atana Electoral Photo Identity Cards (EPIC) number lem hmanga vote thlak an awm lohna tur atana hmalakna kal zel a nih bakah, Lok Sabha, Leader of Opposition Rahul Gandhi pawh hian Lok Sabha-ah a lo thlen tawh a ni. Hei bakah hian eptu party lam hian Parliament chhung leh pawn lamah pawh hemi lama hma la tur hian an lo nawr tawh bawk.

ECI lam hian kum 2015 khan Aadhaar leh voter ID thlunzawmna tur hian hma an lo la tawh a ni. Hemi ṭum pawh hian National Electoral Rolls Purification and Authentication Programme (NERPAP) tih hming vuahin electoral roll-a diklo taka inziaklut an awm leh awm loh endikna tura tih a ni. Hemi kuma an hmalakna hmang hian thla thum chhungin Voter ID maktaduai 300 an thlunzawm hman niin an tarlang.

Hetih mek laiin Trinamool Congress lam chuan Inrinni liamta khan, CEC-in meeting-a huaihawt chu hmingchhiat khuhna ang chauh nia an ngaihthu sawiin, Trinamool Congress Rajya Sabha MP leh deputy leader Sagarika Ghose chuan," Hmalaknate hi a hming chauha kalpui anih kan hlauh avangin uluk takin inthlan hma chu kan vil reng dawn" ati ve bawk.