Chhattisgarh sorkar chuan Maoist hel inpete chhawmdawlna tur policy pawm

Chhattisgarh sorkar chuan, “Chhattisgarh Naxalite Surrender/Victim Relief and Rehabilitation Policy-2025,” chu “Chhattisgarh Naxalism Eradication Policy-2023” thlakna turin state cabinet chief minister Vishnu Deo Sai kaihhruina hnuaia ṭhukhawm chuan an pawm. He ruahmanna hi state chhunga Maoist vanga buaina chhuak ṭhin nuaibona tur atana hmalakna a ni.

Policy thar pawm hian a thil tum ber chu, Maoist hel mahni duh thua silai tungte chhawmdawlna tur leh vantlang nunphung pangaia an awmve theihna tura ruahman a ni. Policy hmang hian Maoist aṭanga silai tungte chu awmze nei zawka puihna hrang hrang leh chhawmdawlna bakah eizawnnate ngaihtuah sak an nih bakah venhimna ṭha tak pek an ni dawn bawk a ni. Helpawla tel ṭhinte chu khua leh tui ṭha an nih theihna kawnga pui thei tura ruahmanna siamsak an ni bawk.

Cabinet chuan policy thar rual hian Maoist aṭanga inpete tan hian scheme ṭha tak an duang nghal a, scheme kaltlang hian mahni kut kawih hna thawh dante, thiamna thar tihpunna kawngah te training pe theitur scheme an duang tel bawk.

Hun hmasa lamah pawh hel pawl aṭanga bangte hian nun phung pangaia nungin pawikhawihna kalsanin mahni kutkawih hnate an lo thawk tawh ṭhin niin a tarlang.