Lok Sabha-ah Oilfields Amendment Bill pawm

Lok Sabha ṭhutkhawm nimina neihah, bill thar Oilfields (Regulation and Development) Amendment Bill, 2024 chu pawm a ni. Bill thar pawm hi, tuialh thei leh gas aṭanga investment awm theite tihhmasawnna thlen thei tur anih beisei a ni. Lok Sabha-a pawm a nih hma hian nikum December-ah khan Rajya Sabha-ah pawm a lo ni tawh bawk.

Bill thar Lok Sabha-a pawm hi, tuialhthei leh gas bakah leilung hausakna lakchhuahna kawnga inrelbawlna mumal awm theihna atana tih niin, ahmaa dan lo awmsa Oilfields (Regulation and Development) Act, 1948 thlakna tur leh dan awmsa tih chang tlunna tura ruahman a ni. Bill tharah hian, dan loa tuialhthei laihchhuahnaa in hnamhnawihte hremna pawh mumal taka duan a ni.

Union Petroleum and Natural Gas minister Hardeep Singh Puri chuan, bill chungchanga zawhnate chhangin tuialhthei leh gas man chungchang sawiin kum thum liam ta chhung khan prime minister Modi-a kaihhruaina hnuaiah khawvel puma tuialhthei man thlawmna ram a nih thu a sawi. Petrol leh diesel man te chu PM hmalaknain ṭumhnih ngawt central excise (duty) chu a tih hniam vang niin a tarlang.

Hetih lai hian Puri chuan Congress rorelna state ṭhenkhatah chuan petrol leh diesel-a value added tax(VAT) lak ṭhin chu tihpun a nih thu a tarlang bawk. India ram ṭhenawm ramten tuialhthei man an lak chu India aiin 15% aṭanga 25% laia a to zawk thu a sawi a, Europe ramte bakah US ah chuan tuialhthei man hi a sang zawk niin a tarlang bawk.

Bill thar pawm chungchangah hian Congress leader Manish Tewari chu ṭawng chhuakin, dan thar pawm chuan 'hma tlir leh kalpui dan tur a tlachham' niin a sawi ve thung. Tewari chuan India chu hmalam huna tuialhthei zawn chhuahna turah a la in peihlo tih a sawi bakah, ruahmanna siam chuan India chu mahni bila tuialhthei zawn chhuah kawngah sorkar chuan ruahmanna felfai a la neilo niin a sawi. Bill chuan tuialhthei zawng chhuaktute tan sum ruahman mumal a duang em tih a zawt zui bawk.