Sorkar laipuiin 'Gig worker' te e-Shram portal a inziaklut turin ti

Union Ministry of Labour and Employment chuan platform worker, gig worker-te chu e-Shram portal-ah inziak lut turin a ngen.

Delivery boy hna thawktu, lirthei khalha eizawng bakah hna nghet ni lo project basis-a hna thawkte chu 'gig worker' huanga dah niin, portal-a inziah luh hi Ayushman Bharat Pradhan Mantri Jan Arogya Yojana (AB-PMJAY) hnuaia hlawkna awmte an tel theihna tur atana ruahman a ni.

AB-PMJAY health scheme kaltlang hian chhungkaw pakhatin kum khatah dam lohna an tawh palhin, sorkar hospital leh private hospital thlan bikah enkawlna senso chu Rs nuai 5 chin an bill thei a ni. Kumina sorkar laipuiin budget a pharhah khan, heng online kaltlanga hnathawktu hrang hrangte tan hian e-Shram portal-a inziah luh chu AB-PMJAY kal tlanga inenkawlna an hmuh theihna tur atan a ruahman tel a ni.

Gig and platform worker-ten sorkar aṭanga in enkawlna awmte an chhawr theihna tur hian e-Shram portal-a inziahluh chu an tih ngei tur a nih thu an tarlang. Portal-a in ziah luh hnu hian, identity card chu an mamawh huna hman theih turin pek chhuah an ni dawn a ni.

Sorkar laipui chuan heng hnathawhna hmun tarlan hrang hranga thawktu chhawrlai neite chu an mi chhawrte tana hamṭhatnate an tel theihna turin hmalakna nei a, hnathawktute buaipui sak thuai turin a hriattir nghal bawk.