India leh EU in FTA chungchang sawi ho dawn

India leh ram 27 in telkhawmna, European Union (EU) bloc chuan a ṭum 10-na turin vawiin, Thawhṭanni hian Belgium khawpui Brussel-ah Free Trade Agreement(FTA) chungchang an sawi ho dawn. He inbiakna hi US president Donald Trump-an ramdang aṭanga chhiah an lak ṭhin a tih pun vanga kawng dang dapna pakhat a ni.

Inbiaknaah hian a hmaa an lo rel tawh, la tih fel lohte chu kumin ralhma ngeia tihfel hman tum a ni, March 14 thleng a awh ang.

EU commissioner for trade and economic security, Maros Sefcovi-a'n tun hnaia India a rawn tlawh khan, hlawkpui theih tur insumdawn tawnnaa inremna tur leh tih chakna tur chungchang an lo sawi tawh a ni. Thla hmasa pawh khan prime minister Modi leh European commission president Ursula von der Leyen-te chuan President Trump chhiah tih pun kaihhnawihah hian insumdawn tawnna siam ngei an lo remti tawh bawk.

Zirchian hna thawktu, Global Trade Research Initiative (GTRI) chuan agriculture chhiah, a bikin bawnghnute leh wine chawk luh aṭanga chhiah lak tur , lirthei chawkluh aṭanga chhiah chawi tur leh hnathawktu nghawng thei kaihhruaina dan awmte huangah inbiakna hi neih tur niin a tarlang.

Tun dinhmunah India hian EU hnenah hian bungrua USD vbc 76 hu leh service USD vbc 30 a thawn chhuah laiin, EU chuan India-ah bungrua USD vbc 61.5 leh serviceUSD vbc 23 chauh a thawn lut thung. Inbiakna neih turah hian agriculture huang chu inremna neih harsatna ber tur nia sawi niin, hei hi EU lamin India-in cheese leh bawnghnute phut aṭanga chhiah lak tih danglam a phut vang nia sawi a ni.

Hetih laiin GTRI founder Ajay Srivastava chuan, EU lam chhiah lakdan kalphung khirh tak chuan angriculture huangah inbiakna a tih harsat theih thu a sawi ve bawk. European wine siamtu lam pawhin India market-a in hralh tam an duh avang hian India in chhiah a lak 150% chu India-Australia Economic Corporation and Trade Agreement(ECTA) an kalpui anga 50% a tih hniam an phut ve bawk.

India leh EU hian lirthei chawk luha chhiah lak dan pawh an ngaihtuah tel dawn. EU hian India-ah hian lirthei leh a part USD vbc 2 man hu kumtin thawn lut ang a ni a, India lirthei siamna industry te chu ram economy tana ban pawimawh niin, ramchhungah mi maktaduai 40 velin hna thawhna atan an hmang a ni.