Hel pawl pahnih inkahna thlengah mi 2 thi

Jharkhand-a Khunti district leh West Singbhum ramriah helpawl, Maoists People Liberation Front of India (PLFI) chhunga pawl pahnih inkarah buaina chhuakin, March 2, Pathianni zan zanlai bawr vel khan an inkap. Inkahna thlengah hian mi pahnih an thi.

Chaibasa SP Ashutosh Shekhar chuan pawl chhung buaina awm avangin helpawl pahnihte inkarah inkahna hi chhuak zui a nih thu a tarlang. An inkahna hmunah police-ten ruang pahnih hi an hmuh thu a sawi bawk.

Buaina chhuah thu hi police hnenah hrilh hriat a nih hnuin, thil thlen dan thlithlai tur hian beihpui thlak a nih nghal thu Shekhar hian a sawi," Inkahna chhuah hun hi Pathianni zan zanlai a ni a, mahse police-te chu Thawhṭanni zingah chauh hriattir kan ni. Inkahna hmunah hian dap chhuah hna ngawrh taka thawh zui a ni," a ti. Police-te hian an beihpui thlaknaah tualchher pistol leh magazine, silaimu, 12-bore bullet pahnih, mobile phone, PLFI levy receipt bakah bag dum a chhunga pawisa fai Rs 402 awmna an chhar a ni. Inbeihna thlenga thi pahnihte hi thubuai nei lai ve ve an ni tih police-te chuan an sawi.