Madhya Pradesh sorkarin wheat leina man ti sang

Madhya Pradesh sorkar chuan loneitute hnen aṭanga wheat a leina man tur a tisang. hei hi wheat thar chhuah a thehluh tam theihna tura ruahman a ni. State-in central stock-a wheat a thawn zat hi nikum aṭang khan a tla hniam a ni. MP hi ramchhungah Punjab dawta wheat thar tam ber a ni.

State sorkarin loneitute wheat thar a leina tur atan hian, minimum support price (MSP)-ah kumin atan Rs 2,475 a ruahman. Sorkarin a leisakna tur quintal khatah Rs 175-in a ti punga, quintal khatah Rs 2,600 a seng tawh dawn a ni. MP bakah hian Rajasthan sorkar chuan wheat thar leina atan quintal khatah Rs 150-ah tih pun an ruahman tih an puang ve bawk.

MP sorkar hmalakna thar hian loneitute a tih lawm hle rin a ni. Kumin atan wheat thar hi district ṭhenkhatah March 15 aṭanga lei ṭan tum a ni bawk. MP hi 2020 khan wheat thar tam ber niin metric ton nuai 129 a thar a, Punjab leh Haryana-te a khum. 2021 khan MP hian metric ton 128 an thar leh thei a, hemi hnu hian state thar chhuah chuan tlakhniam lam a pan a ni.

State sorkar chuan kumin chhungin wheat hi metric ton nuai 310 aṭangin nuai 80 thar chhuah a tum. Hemi hlawhtlinna atan hian MP sorkar chuan an hnuaia loneitu inziak lut nuai thum chuangte wheat thar leina tur hmun procurement center 4,000 lai an siam bawk. Wheat leina man tur tih san bakah MP sorkar chuan loneitute puihna turin ram hectare khat zelah Rs 4,000 pek an nih tur thu a puang bawk.