Jharkhand sorkar-in 2025-26 FY atan Rs vbc nuai 1.45 pharh

Jharkhand sorkar chuan, nimin Thawhṭanni khan kum 2025-26 financial year-a hman turin state budget, Rs vbc nuai 1.45 a pharh. Budget hi chief minister Hemant Soren kaihhruai sorkar thar hnuaia an pharh hmasak ber a ni.

Budget pharhtu, finance minister Radhakrishna Kisore chuan kum 2025-26 sorkar kum chhungin state economy chu 7.5% a ṭhan hman beisei a nih thu a sawi. Budget tharah hian sum indaih lohna tura an chhut chu Rs vbc 11,253 a nih thu a sawi.

Finance minister Kisore chuan budget tharah hian social sector huanga hman tur atan hian Rs vbc 62,844 dah a nih bakah, Rs vbc 13,363 chu Mayan Samman, hmeichhiate tana sum hmanga puihna atan dah a nih thu a sawi.

Agriculture sector-ah RS vbc 4,587 dahin, Chief Minister flagship scheme Livestock Development scheme atan Rs vbc 255 dah a ni bawk. Thingtlang lam tih hmasawnna turin Rs vbc 9,841 ruahman a ni a, kawngpui siamna turin Rs vbc 1,200 dah a ni. Hei hian kawngpui km 1,200-a thui siamna tur leh, lei 10 siamna tur a huam. State chhungah J-Hub leh Technology Park siam tum a ni bawk. Healthcare facility tih changtlun a, healthcare hna thawktute tan training tam zawk siam tum a ni a, hei bakah khawpui pasariah medical college siam tum a ni bawk a ni. Jamshedpur, Gumla, leh Sahibganj-ah university thar din an tum bawk.