CBI-in cryptocurrencies Rs vbc 23.94 hu man

Central Bureau of Investigation (CBI) chuan Rs vbc 6,600 hu GaitBitcom inbumna kaihhnawihah nimin khan state panga hmun 60 chuang an dap a, cryptocurrencies, Rs vbc 23.94 hu an man.

CBI hian he inbumna kaihhnawihah hian February 25-25 khan Delhi, Maharashtra-a Pune, Nanded, Kolhapur leh Mumbai, Karnataka-a Bengaluru leh Hubli, Punjab-a Chandigarh leh Mohali, Uttar Pradesh-a Jhansi hmunah a dap hna hi an thawk a ni.

Beihpui thlaknaah hian cryptocurrency bakah hardware crypto wallet eng emaw zat bakah document 121, laptop/hard disk 34, mobile phone 12, leh email leh messaging app hman tawh loh eng emaw zat an man tel bawk.

Agency chuan he inbumna, ‘GainBitcoin’ scheme hi kum 2015-a Amit Bhardiwaj(L) leh Ajay Bharjwal bakah mi dang eng emaw zatin an kalpui ṭan tih a sawi. He scheme hi multi-level marketing (MLM) tih dan phung zawmin, investor-te chu thla 18 chhung Bitcoin investment an tih chuan thla tin a pung 10% pek zel an tiam. Hei bakah he scheme mi dang a sawm luh theih chuan hlawh, commission an tiam bawk. Hemi hmang hian an scheme-ah hian mi tam tak an bum lut a ni. A tir lamah chuan an pung an pek turte pawh ṭha takin an pe chhuak a, mahse kum 2017 aṭang khan an scheme hi a buai a, sum pek tur pawh cryptocurrency ah an thlak ta niin CBI chuan a sawi.

Enforcement Direc­torate chuan sum tihchingpen chungchang hi a chhui mek a, Prevention of Money Laundering Act hnuaiah India leh ram pawna bungrua a hreng tawh a, Dubai-ah office paruk a hreng tel bawk. Marketing agent hmangin investor-te chu Bitcoin lei a, ‘GainBitcoin’ scheme-ah invest tir an ni. Heng mite hian investment Bitcoin 80,000 hu vel zet an khawn khawm hman a ni.