Liquor policy vangin Delhi sorkarin Rs vbc 2000 hloh

Delhi sorkar thar lakluh hnua assembly hmasa ber, nimin Thawhlehnia neihah Comptroller and Auditor General of India(CAG) report pharh a ni. CAG report-in a tarlan danin 2021-2022 Liquor policy aṭangin policy mumal lo leh chak tawk loh avangin Delhi sorkarin Rs vbc 2002 a chan.

Chief minister Rekha Gupta chuan kar hmasa Ningani khan CAG report chu session hmasa berah pharh a nih tur thu alo sawi tawh a ni. CAG audit-na tangkhang rengah hian - state finances, public health infrastructure, vehicular air pollution, liquor regulation leh Delhi Transport Corporation chungchang report-te chu pharh tura tih zingah hian a tel.

CAG report chuan liquor policy hi zu ṭha lo zawrh chhuah leh hralhte umbo tuma din ni mah se, a hna thawh dan tur hrang hrang ruahman tih hlawhtlin loh tam tak a tarlang.

Liquor policy tih bo tak chungchangah hian policy ṭhat tawk lohnate zirchianga siamṭha tur mithiam bik awmna panel din chu rawt ni mah se, Delhi deputy chief minister leh excise minister hlui Manish Sisodia khan heng rawtnate hi a lo hnawl a ni. Rekha Gupta kaihhruai sorkar thar chuan Aam Aadmi Party (AAP) sorkar hnathawh dan hrang hrangte ennawnin hma an lak tawhnate an thlirlet a, hemi aṭang hian zu zawrh phalna license an pek chhuah danah thil dik tawk lo a awm tih hmuhchhuah a nih thu an sawi.

Policy duang ṭha tura committee din rawtna hnawl a nih hnu hian, zu zawrhna dawr, wholesale-a pekna chu group of ministers(GoM) chuan mimal anga pek remtiin, lottery system hmanga zuar chhuak tur thlang loin a chhang huaite aṭanga pek a ni a, bidding pawh ṭumkhat chiah neih a ni. Hei hian a chhangtu, bidder-in zawrh chhuahna hmun mi pakhatin pahnih chauh neih theih chu bawhchhiaiin mi pakhatin 54 lai an neih theih phah. Hengte avang hian AAP sorkar chuan nasa taka beih tawkin hruaitu lawk tak takte an talbuaiin lungin tangte an awm phah a ni.