Independent hnuah a vawikhat nan Chhattisgarh-ah inthlanna nei

Chhattisgarh-ah Sukma district huamchhunga Kerlapenda thingtlang khuaah Panchayat inthlan neih a ni a, hei hi India independent hnua inthlan an neih vawi khatna a ni. Inthlan hi thawh thuma neih niin, a thawh thumna hi Pathianni liam ta khan neih a ni.

Inthlan vawi khat an neihnaah hian vote thlak pawh an ṭha hle a, mahni remchan angin km 70 hlaah te vote thlak tur hian an kal a ni.

Helpawlin he khua hi an thunun reng avangin inthlanna hi hun rei tak an nei thei lo a, mahse sorkarin 'anti-terrorist movement' kalpuia nasa taka CPI(Maoists) hel nuaibo tura a hma lakna kal zel avangin inthlan pawh hlawhtling taka neih theih a ni ta a ni. Kerlapenda khaw mi tam tak chuan he hun an tawn chungchang hi sawiin," Vote kan thlak vawi khatna a ni a, khaw chhungin a mamawhte pawh kan sut chhuahpui ve thei tawh dawn a ni," an ti.

Sukma district-ah Kerlapenda khua hian tunhma in vote an la thlak ngailo a, tun ṭum Panchayat inthlanah khan a thawh thumna, Pathianniah vote an thlak a ni. Hei hi India independent hnuah khaw mipuiten vote an thlak ṭum khatna niin sorkar hnenah hian an mamawh hrang hrang tarlangin an khaw chhungah ngei hnathawh tur, electric, pension leh nitin mamawh hrang hrang leh hmanruate neih ve theih tawh an beisei thu uar takin an au chhuahpui a ni.