India leh Pakistan sipai aiawhte inbia

Tunhnaia Jammu huamchhung, Line of Control (LoC) a India leh Pakistan inkahna thleng zeuh zeuh avangin nimin, Zirtawpni khan Pir Panjal valley, Poonch district-ah ram pahnih sipai aiawhten inbiakna neih a ni. Inbiakna hi helai huama boruak sosang tur tih ziawmna tura tih a ni.

Inbiakna hi brigade-commander level-a neih niin, chawhma lamah Poonch-a Chakkan-Da-Bagh crossing-ah an nei. Meeting hian darkar khat chuang awhin, LoC huam chhunga tun hnaia boruak sosang chungchang sawi a ni. Inbiakna neih zawhah hian thuchhuah inṭawm emaw hmalak dan tur emaw engmah tarlan a awm lo.

Official-in an tarlan danin meeting hi LoC huam chhunga remna leh muanna a awm theihna tura 2003 leh 2020 a inkahhai puanga inremna, India leh Pakistan sipaiten an lo siam tawh kenkawh theihna tura nawrna tura tih a ni. Hetih lai hian meeting nei hma darkar 24 liam taah LoC huam chhung Poonch district-ah hian bomb siamchawp puak leh inkahnate a thleng a ni.

Jammu, Rajouri leh Poonch district-a ramri kaltlangna hnaihah tun hnai thla hnih liam ta chhung khan inkahna vawi ruk a thleng a, bomb siamchawp puak vang hian sipai pahnih an thi bawk. Thi zingah hian Captain tel a, anni bakah hian sipai dang pahnih chu Sniper in an kap nia sawi a ni bawk.