Railway Ministry-in station-a inpawngnekna video paih turin ti

Railway Ministry chuan February 15-a New Delhi rel station-a inpawngnekna thleng lai video, social media platform 'X' a pholan te chu paihbo vek turin a hriattir.

Inpawngnekna thleng lai video pholan ṭhenkhatah hian mitthi leh hliam tuarte tarlan an nih vanga ti bo tura tih an ni. Ministry hian X hnenah hian video paihbo tur hian darkar 36 chhung hun a pe bawk.

He hmalaknate hi December 2024-a Railway hnena thuneihna thar pek a nihna hmangin, f information and publicity (Railway Board)-a executive director chuan Information Technology Act-a section 79(3)(b) hnuaiah social media hnenah hian hriattir hi a ti chhuak a ni.

Official-a tarlan a nih danin, New Delhi station-a inpawngnekna chhuakah hian mi 18 an thi a, an zingah hian hmeichhia pakua, mipa leh naupang pali ve ve an tel. Hliam tuar eng emaw zat an awm bawk. Inpawngnekna thlen lai hian station-ah hian mi 50,000 chuang an awm nia tarlan a ni bawk.

He chhiatna thleng vang hian Delhi High Court chuan sorkar laipui, Indian Railway, leh Railway Board hnenah hriattirna pein, hmalam hunah hetiang chhiatna a thlen tawh lohna tura ruahmanna siam thuai turin a ti a ni.