PM-in US university-te India-a campus hawng turin sawm

Prime minister Narendra Modi chuan US-a a cham chhung khan US-India thawh dunna tih chakna turin zirna huangah thawh dunna zau zawk neih dan a ngaihtuah a, America college-te chu India-a campus hawng turin a sawm.

PM Modi leh US President Trump-te White House-a thupui hrang hrang sawia inkawmna an neihah khan zirlai thiamna leh theihna sang tak tak neite dinhmun tih hmasawnna tura rampahniha zirlai, researcher leh hnathawkte hlawkna tel theih ve ve turin ruahmanna siam chungchangte an sawi dun a ni.

Open Doors Report-in a tarlan danin, India mi zirlai US-a awmte chu 2023-24 academic year-ah 3,31,602 niin, 2022-23 a awm zat 2,68,923 aiin 23% in an tam zawk. Hemi vang hian PM Modi leh President Trump chuan ram pahniha mipuite inkara hmasawnna awm thei tura hmalakna neih ṭha tiin, higher education institution kaltlanga hmasawnna te hi thlen tir theih an beisei.

An meeting zawha thuthar lakhawm tute an kawm naah PM chuan," American University leh educational institution-te chu India-ah campus thar te rawn din turin ka sawm a ni," tiin ram pahnihte inkar tih hmasawnna, a ram mipui ve ve te inkarah a awm theih a duh thu a sawi.

Students and Exchange Visitor Information System (SEVIS) record-a a lan danin, non-immigrant student visa, F1 leh M1 hmanga lut zirlai, kum 2023 chhunga awm chu 1,503,649 niin kum 2022-a awm zat aiin 10.4% in an tam zawk. India hian kum 2023 kum bikah US-ah zirlai 3,77,620 thawn lutin, China-in zirlai 3,30,365 a thawn lut thung.

Hetih lai hian UK-a Southampton University chuan kumin chhungin India-ah campus din an tum tih an sawi. Australian university pahnih, Deakin leh Wollongong chuan Gujarat International Finance Tec-City (GIFT City)-ah campus an nei tawh bawk.