Delhi BJP-in CM leh cabinet puan leh lawmluh hun tur sawn

Delhi assembly inthlan neih zawh taka hnehna changtu, BJP chuan sorkar thar din a nih theihna tura legislative party meeting neih tura ruahmanna lo siam tawh chu a sawn. Meeting-ah hian prime minister Narendra Modi leh union home minister Amit Shah, BJP president JP Nadda-te kaihhruainaa Chief Miniter leh cabinet minister turte ruat tum a ni. BJP hian kum 27 hnuah Delhi-ah sorkarna an siam dawn a ni.

Ruahmanna siamah nimin, Thawhṭanni khan meeting neih tura tih chu naktuk, Nilainiah sawnin hemi rual hian chief minister leh cabinet tharte lakluh hun tura ruahman pawh February 20, Ninganiah sawn hlat nghal a ni bawk.

Delhi sorkar thara hruaitu turte ruat leh lakluh hun hi PM Modi zin haw hun nghah a ni a, Pathianni khan a rawn kir tawh a ni. Hetih lai hian meeting neih hun tur sawn hlat a nih chhan hi engmah tarlan a ni lo.

Delhi chief minister Atishi pawhin BJP te chu hun an khawhral rei chungchangah a dem thu sawi chhuakin," Inthlan result puan a ṭanga ni 10 ral hnuah pawh sorkar thar din thei tur ruat chhuah a la ni lo. Hei hi BJP in hruaitu ni tlak an neih loh vang leh PM Modi-an MLA 48 zingah rinngam leh Delhi sorkar hruaitu tur a neih loh vang a ni", tiin an hun tiam an tih danglam vang hian a bei zui a ni.

BJP hian official-in thuchuah la nei lo mah se, hruaitu tur atana beisei hming 14 sawi lan a ni tawh. Hming tarlan zingah hian Bansuri Swaraj, Virendra Sachdeva, Pravesh Verma, Vijender Gupta, Manoj Tiwari, Satish Upadhyay and Manjinder Singh Sirsa, Rekha Gupta-te langin an zingah hian Parvesh Verma chu CM tura rin ber a ni. Ani hi Delhi CM hlui leh AAP national convenor ni bawk, Arvind Kejriwal khing thlatu a ni.