Lok Sabha-ah Waqf Bill report pharh

Waqf (Amendment) Bill chungchanga Joint Committee report chu nimina Lok Sabha inkhawmah eptute aubuaina karah pharh a ni.

Panel chairman Jagdambika Pal chuan Lok Sabha-ah report hi pharhin Rajya Sabha-ah panel member Medha Vishram Kulkarni chuan a pharh ve bawk. Report pharh lai hian eptu lam nasa takin an lo au buai a, rorellai member lamin an lo chhawn let bawk. Lok Sabha aṭangin eptute an chhuak zui a, Rajya Sabha-ah pawh member-te aubuai avangin chairman Jagdeep Dhankar chuan rorel inkhawm a ti tawp lailawk.

Rajya Sabha-a Leader of Opposition, Congress party president Mallikarjun Kharge chuan report-a thu ziah dan ṭhenkhat chu paih an phut tih sawiin, an thil ziah dan chu a democracy kalphung lo hle a ti. House chairman Dhankar chu report hi hnawl a, ngaihtuah ṭhat leh tura committee-a thawn let turin a phut.

Lok Sabha-ah pawh Congress MP Gaurav Gogoi chuan MP-te chu Joint Committee report zirchianna hun pek an ni lo a, phek 655-a chhah report hi chhiar turin zan khat chiah hun pek an ni tih a sawi. AIMIM MP Asaduddin Owasi pawhin Waqf Bill hi Constitution-a Article 14, 15 leh 29 kalh a ni tih a sawi ve bawk.

Waqf (Amendment) Bill hi Waqf Act, 1995 thlakna tura ni. Bill-ah hian State Waqf Boards leh Central Waqf Council-ah Muslim ni kher lote awm phalsak an ni tawh ang. Survey Commissioner chu Collector in thlak a ni bawk a,ani hian waqf thil neihte enfiah turin thuneihna a nei dawn a. Sorkar hmunhma, waqf anga chhalte tih tawp a ni bawk ang.