Delhi court-in Congress MP Sajjan Kumar thiam loh chantir

Delhi court chuan nimin, Nilaini khan Congress MP Sajjan Kumar chu kum 1984-a Sikh mite tualvuakna thlenga Jaswant Singh leh a fapa Tarundeep Singh thah an nih kaihhnawiha thubuai siamsakah thiam loh a chantir.

Special judge Kaveri Baweja chuan thiam loh a chantirna hi puangin, February 18 ah Tihar jail-a dah luh turin a chungthu hi rel a ni. Kumar hi November 1,1984-a Sikh mite tualvuakna thlen ṭuma thihna thleng kaihhnawihah hian Punjab Bagh police station-ah thubuai hi ziah luh a ni a, special investigation team-in chhuichianna an nei zui a ni.

Court hian December 16, 2021 khan Kumar hi pawikhawihna thlengah a in hnamhnawih ngei tih a finfiah hnuah thubuai hi siamsak a ni. Hmanrua hlauhawm tak hmanga intualvuakna thlengah hian Jaswant te chhungkua chu thah niin an thil hlu neihte chhuhsak an nih bakah an in halsak an ni bawk, tiin court hian a tarlang.

Hun rei tak chhung Kumar thubuai ngaihtuah a nih hnuah, court chuan he pawikhawihna thlengah hian tel ve satliah mai ni loin pawikhawihna thlenga a bultumtu ber a ni tih a finfiah a, thiam loh a chantir zui ta a ni.