PM Modi leh President Marcon-ten AI Summit kaihruai

Prime minister Narendra Modi chuan AI Action Summit hmang turin Thawhṭanni khan France khawpui, Paris a thleng a, nimin khan France president Emmanuel Macron nen AI Summit an kaihruai dun a ni. Modi hian Prime Minister a nih hnuah France a tlawh vawi rukna a ni.

France President chuan PM Modi hi a thlen zan hian a lawmna zanriah a lo buatsaih sak nghal a ni. Zanriah kilnaah hian US vice president JD Vance pawh a tela ni. Modi hi France-ah hian ni hnih a cham dawn a, Paris aṭang hian US a pan leh ang.

Nimina AI Action Summit hawnnaa thu a sawiah, PM Modi chuan tunlai khawvelah AI pawimawhna te sawiin, 'Kan polity, economy, security leh society thlengin AI hian a rawn duang tawh a ni," a ti. Kum zabi 21-naah chuan AI chu mihringte code siamtu a ni tawh a, technology dangte khawvel chanchina mellung an lo siam tawh dante nen a danglam hle a ni, tiin a sawi. AI chuan mi maktaduai tel te hriselna, zirna, agriculture leh thil dangah hmasawnna a thlen thei a, Sustainable Development Goals awlsam leh chak zawk thlen theihna tura khawvel siamna kawngah pawh a pui a ni, tiin Modi chuan a sawi bawk. Hetih lai hian mi ṭhenkhat chuan mihring finna aia khawl an rawn chungnung zawk an hlau a, mahse tumahin mihringte hmakhua leh an theihna te chu an thunun thei lo, a ti. India chuan AI lama a tawnhriat leh thiamnate chu mi dangte hriattir ve zel pawh a inhuam thu Prime Minister chuan a sawi.

Nimina AI summit-ah hian France President Macron, US Vice President J D Vance, UN Secretary-General Antonio Guterres, European Commission President Ursula von Der Leyen, Canada PM Justin Trudeau te pawh an tel.

Summit zawh hnuah Modi leh Macron te chuan India-France CEO forum meeting an telpui bawk a, he hunah hian India-France insumdawnna chungchangte sawiho a ni.