A ṭum khatna atan voter list-ah Jarawa tribe member awm

Andaman and Nicobar Islands administration chuan Jarawa tribal hnam mi 19-te chu a voter list-ah ziak lutin, voter ID an pe. Voter list-a an awm ṭum khatna a ni.

Jarawa tribe hi inlahrang leh hlauhawm tak nia sawi a ni ṭhin a, South Andaman district-a Jirkatang-ah kahsain, Particularly Vulnerable Tribal Group zingah an tel. Chief secretary Chandra Bhuhsan Kumar chuan an hnam zinga mi 19, voter list-a telhte chu an chenna hmunah hian kal chilhin voter ID hi a hlan a ni.

Jarawa hnam hi Andaman Islands-a indigenous tribe zinga mi an ni a, ramngaw hausakna rinchhan leh an chhehvel a natural environment nena inzawmna thuk tak neia hriat lar an ni. Pawn lam mite hlat taka awmin an tlawhpawh lo a, an nunphung danglam tak chu an vawng nung chho zel a ni. Hetiang ni chunga voter list-a awm tura ziah luh a ni thei hi India democracy tan pawha hmasawnna leh thil chhinchhiah tlak tak a nih thu South Andaman district election officer Arjun Sharma chuan a sawi. Hemi rual hian an khawsak phungah a tlem thei ang bera va inrawlh a, India khua leh tui a nih anga an dikna chanvote erawh hriatthiam tir tum a nih thu a sawi bawk.