Kawngpuia accident-te tana a thlawna in enkawlna tur scheme puang

Union minister Nitin Gadkar chuan India ram puma hman tur, kawngpuia accident tuarte a thlawna damdawia enkawlna tur, 'cashless treatment' scheme thar siam chu nimin khan a puang.

He scheme hi kumin March thla aṭanga hman ṭan tur a ni a, kawngpui a lirthei emaw a dang emaw vanga accident tawk te tana in enkawlna tur a ni, a ti. He scheme thar hman tur hnuaiah hian kawngpuia lirthei hmanga accident tawk tute chuan chetsualna an tawh aṭanga darkar 24 chhunga police an hriattir hman chuan,police-ten a thlawna enkawl an neih theihna tura document pawimawhte chu hospital hnenah pawh an inenkawlna hi mi pakhat tan ni sarih chhungin Rs nuai 1.5 thleng a thlawnin an dawng thei dawn a ni. Hit-and-run case-a vanduaina tawk chhungte chuan zangnadawmna Rs nuai 2 an dawng thei bawk ang.

National Health Authority(NHA) chu he programme implementing agency an ni dawn bakah police, damdawi in, leh State Health Agency te nen an thawkho dawn, IT platform hmanga kalpui a ni dawn bawk a ni. Nikum March 14, 2024 khan ministry of road transport and highway(MoRTH) chuan pilot programme chu state ṭhenkhatah hlawhtling takin a lo kalpui tawh a ni.

Sorkar laipui chuan cashless treatment scheme bakah hian, kawngpuia chetsualna thleng tlem tih tlem a nih theihna turin ram pumah inzirtirna kalpui a tum bawk. He hmalakna hnuaiah hian motor khalhtute fimkhur tura inzirtirna bakah, chetsualna thleng chungchang rang taka report ṭhin a pawimawh zia mipuite zirtir a ni bawk ang. Kawngpuia chetsualna thleng tih ziaawmna tur hian kawngpui ṭha siam a, sign tar ṭhatte pawh a ṭul zia sawiin, hma lak zel tum a nih thu Gadkari chuan a sawi bawk.