December 16 thleng Rajya Sabha inkhawm ti tawp lailawk

Parliament thlasik ṭhutkhawm neih mekah, Rajya Sabha rorel inkhawm chu Decemnber 16 thleng atan tih tawp lailawk a ni.

Rajya Sabha chairman Jagdeep Dhankar chu House-a rorelnaah rorellai lam party a duhsak nia sawiin, eptu lam chuan rintawk lohna, 'no-trust motion' put luh tumin notice an thehlut. Hemi avanga member-te inaubuaina thleng reng a, rorelna a kaihhlak reng avangin inkhawm hi December 16 thleng tih tawp a ni ta rih a ni.

Eptu pawl lam hian Dhankar chu mahni party dah pawimawh bik lutuk leh midang ngaihthah bik taka rorel ṭhin ah an puh a, thu an sawinaah pawh rorellai lam member-te chu hun pe tam ṭhin zawkah an puh. Congress kaihhruai eptu pawl hian Dhankar hi thlak a nih theihna turin motion put luh hi an tum a ni.

Hetih lai hian nimina rorel inkhawmah BJP lam chuan Congress party hruaitute chu Dhankar hi hmusita puhin an chhal let ve thung. Member-te in aubuai reng karah Dhankar chuan Congress hruaitu leh Leader of Opposition Mallikarjun Kharge chu thusawi turin a sawm a ni. Dhankar hian Kharge leh House Leadre JP Nadda te chu nimin khan chairman chamber-ah a meeting nei turin a ko bawk a, House-a rorelna mumal taka kalpui a nih theih dan turte a sawipui a ni.

Parliament thlasik ṭhutkhawm hi November 25, 2024 aṭang khan neih niin, December 20 thleng a awh ang. Member-te in aubuai nasat avangin Parliament in hnihah rorel mumal thei loin, inkhawm pawh tih tawp lailawk a lo ni fo tawh a ni.