India-ah mobile malware hmanga in bumna thleng tam ber

Khawvel huapa mobile malware kaltlanga beihna thleng ṭhinah, United State leh Canada pelin India chu inbumna thlen tamna ber ram a ni.

The Zscaler Threatlabz 2024 Mobile, IoT leh OT threat report zirchiannain a tarlan danin, India-ah hian cyber kaihhnawih in bumna chu June 2023 aṭanga May 2024 inkar chhung khan vawi vaibelchhe 20 chuang thlengin, heng in beihna tam zawk hi mobile transaction te niin an sawi.

Mobile kaltlanga in bumna thlenga a chanve thawk hi trojan malware kaltlanga thleng niin apps lem dowload aṭangin a ni. Banking lam kaihhnawiha in bumna chu 29% a pung a; in enthlakna kaihhhnawih, mobile spyware inbeihna hi 111% in a pung niin an tarlang bawk.

India-a mobile hmangtu tam tak chu bank lian HDFC, ICICI leh Axis bank anga in chhala bum an ni tih ThreatLabz zirchianna chuan a tarlang. Heng mite hian bank information dik tawk lo thawn chhuakin, banking website lem ah an mimal thil pawimawhte dil chhuakin pawisa an ruk sak ṭhin a ni.

Indian postal service pawh beih zingah hian a tel . SMS message hmangin an bungrua chah a bo emaw, a thlenna tur address a kimchang tawk lo nia hrilhin website dik loah an luh tir a, credit card detail dil an ni ṭhin bawk.

Hetiang ni chung hian India chuan chanchin lawmawm lamah hmasawnna neiin APAC (Asia-Pasific) huam chhunga malware origin point tehnaa 5-na a hauh ṭhin aṭangin 7-na dinhmunah a tlahniam ve thung a ni.