Trump-a'n NIH hruaitu atan Indian American Jay Bhattacharya thlang

US President-elect Donald Trump chuan Indian-American Jay Bhattacharya chu a kaihhruai sorkar thara National Institutes of Health (NIH), America a health research leh funding institution sang ber hruaitu turin a thlang. Senate in a pawm chuan Bhattacharya hi Indian-American zingah rorelna sanga nihna lian tham chelh thei hmasa ber a ni ang.

Trump hian hemi hma pawh hian Indian-American, Vivek Ramaswamy chu Department of Government Efficiency siam tharah Tesla neitu, Elon Musk nen hian hruaitu turin a lo thlang tawh bawk a, mahse hei hi voluntary position a nih avangin US Senate pawmpuina a ngai ve kher lo thung.

NIH Director thar tur a thlan thu a puan naah Trump chuan ,"NIH director atana Jay Bhattacharya, MD,PhD ka thlang hi ka phur hle. Bhattacharya hian Robert F. Kennedy Jr a thawhpui dawn a, anni hian National Medical Research kaihruaiin hriselna leh nunna chhanna tur kawngah nasa takin hma an la dawn a ni" tiin a sawi.

Bhattacharya hi Stanford University-ah Health Policy professor niin, National Bureau of Economic Research ah research associate a ni a, Stanford Institute for Economic Policy Research, Stanford Freeman Spogli Institute leh Hoove Institution-ah senoir fellow a ni.

Stanford-a Centre for Demography and Economics of Health and Aging a kaihruai bawk. Research a neih te hi vantlang mipui, dinhmun ngaihtuah awm bikten hriselna leh hamṭhatna an neih theihna tur lam hawi niin Economics, Statistics, Legal, Medical, Public Health, leh Health Policy Journals ah te a zirchianna neihte hi a lo ti chhuak tawh a ni.