Russia hi India-a crude oil thawn luttu lian ber a ni : Hardeep Singh Puri

Union minister for petroleum and natural gas, Hardeep Singh Puri chuan Thawhlehni khan Russia chu India-a crude oil thawn lut tu lian ber niin, tun dinhmunah India-in crude oil a chawkluh zawng zawng aṭanga 32% chu Russia aṭanga thawn luh a nih thu a sawi.

Minister Singh chuan Federation of Indian Petroleum Industry (FIPI) Oil and Gas Award hlanna inkhawma thu a sawinaah kum hnih liam ta chhunga India in oil a chawkluh dan chungchang a sawi lang a ni. February 2022 khan Russia aṭanga oil chawkluh 0.2 % chauh ni ṭhin chu tun hnai thla hnih thum chhung lekin a pung ta hluai niin a tarlang.

"February 2022 kha chuan tlem tham tak, 0.2% chauh niin mah se tunah chuan a pung zel a, engtiang in nge a awm zel dawn tih leh hma lam a pan zel dawn em tih chu ka sawi lawk thei bik lo. Hei hi Ministry hmalakna ringawt ni loin oil marketing company leh tender chhang tute vang pawh a ni" a ti.

India hian Russia bakah ram hrang hrang nen inremna neiin oil a lei ṭhin a,hmalam hun atana oil chawkluhna turte chu Saudi Arabia, UAE, Iraq, Kuwait, United States te chu a ram lian zual a nih thu a sawi. Hei hi energy mamawhna sang zel leh khawvel ṭhannain a nghawng a nih thu a sawi a, hetih lai hian India chu kum thum chhunga oil man ti hniam thei awmchhun a nih thu Union Minister hian a tarlang bawk.