India leh US chu an thawhdunin an chak zawk : Blinken

US secretary of state Antony Blinken chuan United States leh India chu an thawh dun in an chak zawk a ni ,a ti. He thu hi Thawhlehnia external affairs minister S Jaishankar nena Fiuggi, Italy-a G7 summit neih karlaka an inbiaknaah a sawi.

"US leh India chu an thawh dun hian an chak zawk ve ve a ni. Indian External Affairs Minister Dr. S Jaishankar nen inkawmna hun hmangin khawvel huap venhimna leh hmasawnna a thlen zel theih nana ram pahnih te thawhdun chu chhunzawm zel dan tur kan sawi a ni," tiin Blinken hian X-a post ah a tarlang. S Jaishankar pawh hian Blinken nena inkawmna hun an neih thu hi X ah tho hian a tarlang ve bawk.

Ram hruaitu pahnih ten meeting an neih zawhah hian, State Department thupuangtu Matthew Miller chuan United States chuan khawvel puma himna ṭha zawk a awm zel theihna atana India nen in hnehnai taka thawh dun chu an duh ber a nih thu a sawi. Blinken leh Jaishankar chuan ram pahnih ten thawh dunna thuk lehzual siam chu an duh thu an sawi tih chu meeting thuchhuahah an sawi bawk a ni.