Disaster relief project atan Rs vbc 1,115 pawm

Union home minister Amit Shah kaihhruai high-level committee chuan state 15-a chhiatrupna thleng avanga chhawmdawl hna thawhna atan Rs vbc 1,000 a pawm. Hei bakah hian ram chhunga state leh Union Territory zawng zawnga civil defence volunteer-te training leh thuam chakna turin Rs vbc 115.67 a pawm bawk

Official thuchhuahin a tarlan danin, Uttarakhand leh Himachal Pradesh tan Rs vbc 139 ve ve pawmin, Maharashtra tan Rs vbc 100, Karanataka leh Kerala tan Rs vbc 72 ve ve, Tamil Nadu leh West Bengal tan Rs vbc 50 ve ve leh hmarchhak state pariat - Assam, Arunachal Pradesh, Manipur, Meghalaya, Mizoram, Nagaland, Sikkim, leh Tripura te hman turin Rs vbc 378 an pawm bawk a ni.

Hemi hma hian committee chuan khawpui pasarih-a Urban Flood Risk Mitigation Projects atan Rs vbc 3075.65 a lo pawm tawh bawk a, Glacial Lake Outburst Flood (GLOF) thleng palh thei inven nan state pali tan Rs vbc 150 chu Natioanal Disaster Response Fund(NDRF) aṭangin an lo pawm tawh bawk.

Prime minister Narendra Modi kaihhruai sorkar hnuaiah hian Rs vbc 21,476 chuang chu kumin chhungin state hrang hrangah chhiatna thleng chhawmdawlna turin pek chhuah a ni tawh. State Disaster Response Fund (SDRF) aṭangin state 26 tan Rs vbc 14,878.40, NDRF aṭanga 15 te hman tur Rs vbc 4,637.66 , State Disaster Mitigation Fund (SDMF) aṭanga pek chhuah state 11 hman tur Rs vbc 1,385.45 leh National Disaster Mitigation Fund aṭanga pek chhuah state paruk hman tur Rs vbc 574.93 te a tel.

" Prime minister Narendra Modi-a'n chhiatrupna dawl zo India siam a tumna tih hlawhtlinna turin, Ministry of Home Affairs chuan Shah kaihhruaina hnuaiah kawng hrang hrang in hma a la ni," tiin official thuchhuah chuan a tarlang.