Srinagar Sunday bazar-a grenade puakah 12 hliam

Jammu and Kashmir-a Srinagar khawpuia Residency Road-ah nimin khan Tourist Reception Center (TRC) bul hnai, bazar lun laiah hel nia hriatten grenade an ti puak a, mi 12 in hliam an tuar.

Official-te chuan helte hian mipui lunna laiah tak grenade hi an vawm lut a, ring takin a puak zui tih an sawi. Mipui pawh an chiai nasa hle. Bazar awmna hmun hi high security zone a ni. Hliam tuarte hi damdawi-in lam panpui nghal an ni.

J&K chief minister Omar Abdullah chuan pawikhawihna thleng hi a dem thu a sawi a, "Tun hnaiah valley hmun eng emaw zatah inbeihna thleng thawm kan hria a, vawiina 'Sunday Market' a kal pawisawilote chu grenade hmanga beih an ni leh bawk. Pawisawi lo civil mite beihna hi ngaihdam theih a ni lo," a ti.

Grenade hi Central Reserve Police Force (CRPF) mi leh sate beih tuma vawm luh nia hriat a ni a, mahse an target hi fuh loin, kawngsir thil zawrhna hmun chu a fuh ta zawk a ni.

Srinagar-ah hian hel pawikhawihna hi thleng fo mah se grenade hmanga inbeihna erawh a thleng khat hle. Nimina grenade tih puah hi kum khat chhunga a thlen vawi khatna a ni.

Kashmir-a inkahnaah LeT  'commander' leh hel 2 thi

Jammu and Kashmir-a helpawl laka beihpui thlakna, anti-militancy operation neihah Inrinni khan helpawl mi pathum kah hlum an ni. An zingah hian misual zawnlai Lashkar-e-Taiba(LeT) commander Usman Lashkari a tel a, foreign mi pakhat leh tualchhuang mi pakhat an tel bawk. Police mi pahnih leh CRPF sipai pahnih in hliam an tuar ve bawk a ni.

He inkahna hi khawpui hlui, Khanyar huam chhungah Inrinni(November 3,2024) zinglama thleng niin, helpawl hian kap hmasain security force lam chuan rang takin an chhang let nghal a ni. "Security force chuan rang takin an thiamna hmangin an bei let nghal a, inkahna thlenna khuaah hian helpawl te zawn chhuah hna thawh niin, helpawl tawmrukna in an dap lai hian helpawl te hian an lo kap zui a ni" tiin Inspector General of Police VK Birdi chuan a sawi.

Khawpui hluiah hian kum thum hnua inkahna a thlen vawi khatna niin, inbeihna t hlen vang hian in pathumah chuan kangmei a chhuak bawk a ni. "Operation hi chawhnu her thleng neih niin inkahna nasa tak neih hnuah hlawhtling takin foreign terrorist Usman Lashkari, LeT mi leh sa chu kahhlum a ni tih finfiah a ni" tiin IGP Birdi chuan a tarlang.

South Kashmir lama operation dang neihnaah pawh sipai leh helpawl te chu Halkan Gali, Anantnag hmunah an inkap bawk. J&K huam chhungah hian thla khat chhungin helpawl chetna lian tham vawi riat thlengin heng zingah hian Kashmir khawtual mi ni lo beihna a thleng bawk. Heng inbeihnaah hian mi 15 in nunna an chan a, an zingah hian sipai pahnih an tel.